Friday, June 18, 2010

Ek chhoti si prem kahani

Tumhe dekhta tha main
Bhor ke akele taare mein,
Kshitij par baadlon ke
Rang badalte, bante bigarte
Aakaron mein.
Sunta tha tumhari hansi har subah
Chidiyon ki chahchahat mein,
Suraj ke aane ki aahat mein.


Jaise jaise din chadhta tha,
Tum kshitij se uth kar
Sama jaati thi samuche akash mein,
Aasman ke nirabhra neele rang mein,
Door kahin chhote se,
Rui ke faahe se kisi
Badal ke tukde mein.
Aur tumhara ek chhota sa hissa
Ban jaata tha roshni,
Ban jaata tha mere ghar ke aage uge
Gulmohar ka phool.


Jab saanjh aati thi dabe paaon,
Main paata tha tumhe
Musafiron ke ghar lautne ki utkantha mein,
Lakdi ke choolhon se nikalti
Dhuen ki lakeeron mein,
Aur sansar par sahsa chhayi
Nistabdhta mein.

Dheere se har roz
Jab raat dhal aati thi
Chand ke pahre mein,
Dekhte the beshumar taare
Tumhe mere sapnon mein aakar lete.
Akela chand aur door uga dhruv taara
Mujhe aur tumhe ek hota dekh
Chhup jaate the baadlon ke saaye mein.

Aur aaj,
Mahsoos karta hoon tumhe,
Ghar ke konon mein jhoolte
Makdi ke jaalon mein,
Baarish ki boondon ke liye
Marusthal ki ret ki prateeksha mein,
Paaon ke neeche achanak aayi
Sheeshe ki kirchon mein.
Aur us tees mein bhi
Jo ghav ke bharne ke barson baad
Jaadon mein anayaas ubhar aaya karti hai.

No comments:

Post a Comment