Saturday, June 19, 2010

Tum yaad aaye

Aaj tum baaraha yaad aaye,
Ye aansoo dinon baad aaye.

Humen achha kyun kahe koi,
Jaane kab se barbaad aaye.

Har taraf pasri khamoshi se,
Kabhi to koi fariyaad aaye.

Is bebas mazboor duniya mein,
Kahin koi ho jo azaad aaye.

Zindagi yun hi guzarti rahe,
Kabhi bulbul kabhi saiyyad aaye.

Koi ghazal ye sune na sune,
Bas apne dil se daad aaye.

'Anand' jis bhi raah se guzra,
Peechhe sheeri-farhaad aaye.

No comments:

Post a Comment